立法會議員何君堯早排俾母校英國安格里亞魯斯金大學搣柴，褫奪佢個榮譽法學博士學位。佢咁愛國，北京又點會畀英國人落佢面吖？所以中國政法大學即刻頒個名譽博士學位畀佢，但網民即時揶揄，話「何已完」等同要由iPhone變華為，真係情何以堪？有眼利網民仲發現，佢呢個榮譽法學博士學位隨時同華為一樣，可能只可以供大陸同大灣區用！

姓名不符難獲國際承認

有連登仔發現何君堯喺facebook貼嘅中國政法大學頒受學位相，其中一張英文證書將何君堯個英文名寫成 Junyao He，而唔係「何已完」一向喺大小官方文件用開嘅英文名為Junius Ho Kwan Yiu。連登仔話正常大學係唔會承認同身份證姓名不符嘅任何證書，所以佢呢個「名譽博士」相信唔會受任何外國大學或機構承認，隨時只供大陸同大灣區用！

點解英文名唔同咗？有連登仔相信係政法大學用普通話拼音寫何君堯個名，於是變咗Junyao He，但奇就奇在香港人申請回鄉卡，大陸都用身份證上嘅廣東話拼音英文名，點解政法大學要用普通話拼音呢？咁叫何已完去外國點拎呢個榮譽法學博士學位出嚟呢？人哋一睇個名，個榮譽法學博士屬於Junyao He，而非Junius Ho Kwan Yiu，萬一因為咁俾外國當佢行使假學位，你話何已完幾無辜呢？

李八方