面對廉航挑戰,生意又越來越難做,國泰航空(293)都要扭盡六壬,噚日安排一班空姐、空少喺半島酒店上演花生騷,推廣冬季嘅機上產品銷售目錄,力谷機艙零售之餘,仲大力宣傳網購,希望幫埋空運生意,今年底可以買到貴價黑松露㖭呀。
唔講唔知,國泰2009年開始推出網購服務,唔坐飛機都可以網購機上銷售產品。
國泰機艙營業經理鄒銘諾透露,計劃年底賣埋黑鑽石法國黑松露,機上或者上網訂購都得,3日內就送到香港府上。價錢當然係按市價計,每300克至500克,估計售價7,000元至兩萬元不等,所有黑松露都會以真空袋袋好。
其實唔只黑松露,國泰都諗過賣神戶牛柳或海鮮,礙於鮮肉嘅運送比較麻煩,先至放棄,暫時只推黑松露。國泰嘅機上銷售亦做得唔錯,年初至今嘅銷售額增長15%。