張智霖(Chilam)、胡杏兒、陳瀅同童愛玲等前晚喺尖沙嘴出席一手錶品牌25周年展覽開幕禮,預產期下月尾嘅杏兒以1.5吋高踭鞋亮相。杏兒話最貴嘅錶價錢唔過7位數,身邊嘅Chilam笑佢係小富婆,杏兒話:「買錶都係獎勵自己,今次同胡說八道會去拍節目好開心,特別係戴住姚子羚男友(鄭子邦)面具扮求婚,其實我都好替姊妹心急。」佢又大爆有胡說八道會姊妹即將出嫁,不過就唔肯講係邊一位。據知,好事近嘅姊妹就係黃智雯同珠寶集團高層男友詹文天。Chilam見到腹大便便嘅杏兒又話:「以前杏兒好有侵略性,𠵱家變得溫柔有媽媽樣。」