孫耀威同女友陳美詩（Macy）感情穩定，只欠一紙婚書。有報道指Macy相約張栢芝幫手出馬，向孫耀威逼婚，今日孫耀威抱病現身新城接受訪問宣傳新碟，笑指逼婚一事「得啖笑」。

老孫話:「當日只係我哋約埋栢芝一齊篤波，佢一向都打得好，若果真係要搵佢做姊妹，應該係我搵佢做兄弟先啱。佢又男仔頭，兼且我識佢耐啲，係我介紹栢芝畀佢（女友）認識，之後栢芝信咗主，佢哋就成日講耶穌。」老孫又話，兩人有計劃想生小朋友而結婚，只係未有詳情。

講番健康問題先，老孫話自己一向怕熱，可能平時經常打大赤膊而冷病，佢話:「有時我揸車都會除上衫，返屋企就除剩底褲，瞓覺更習慣赤裸，著住衫我會瞓唔著，試過同女助手同房，我就著番條褲。」佢自爆屋企係落地玻璃、仲面向馬路，所以有人坐車經過，如果見到有個男人只係著底褲周屋走嘅，可能就係佢。