上半場恒指升4,000點，但股份側重個別科技股，其他大價股、細價股都唔見有好明顯炒風，買中就贏大鑊，買唔中基本上唔覺上半年有牛市，所以最多只可以話係小時代。喺呢個小時代入面，強者越強，隻股本身都會郁，唔使人唱，但係近期「七一前維穩論」越吹越大，反而令高明對後市有啲擔心。

「七一前港股維穩論」最先出自《彭博》，引述消息人士話香港回歸20年，中央七一前支持港股凝造好氣氛。文章5月11日發佈，以推介股票角度嚟計，其實係估中，因為出文後港股最多升近千點至26090點高位。不過，以維穩角度，截至上星期五就唔算太成功，因為港股頭5個月都以升市結終，反而七一前「維穩月」6月出現明顯調整，至今僅升9點，當然唔排除今個星期會有神力出現，但以技術指標超買嚴重計算，冇神力由佢調整，比起夾硬托市嚟得更健康。

股市維穩論喺香港幾乎年年有人唱，例如年頭開兩會前必定有人話中央托市，撇除呢啲年年唱嘅例牌維穩，每隔一兩年都會有大事發生唱穩穩論調，2013年至今起碼有三次，分別係2013年三中全會前、2015年A股股災、2015年年底五中全會前。

2013年三中全會前，本地親中傳媒於9月至11月期間開始發出有關維穩論，指中央經濟正面政策有機會出台，預期對港股將會帶來正面影響。當年嘅維穩論仍較為內斂，刺激港股因素仍係由政策推動，而非明示中央直接入市。事實上，2013年港股從6月低位至11月開會升4000點，維穩後12月兩萬四見頂，翌年1月由高位跌近兩千點。

2015年A股股災，騰訊網7月8日引述消息報導指，應中國證券業協會的要求，7家券商將著手維穩H股股價，明言直接入市維穩港股。港股即月反彈逾千點橫行半個月後，8月再跌近4000點。

2015年年底五中全會前，本地傳媒再傳維穩之風，今次係成功托市例子，港股由9月低位20368點，一直托至開會日10月26日23424點見頂，托足三千點，但由於股災持續，至翌年初跌穿19000點先見底。

大致上，傳出維穩論後，短期的確托得起，但之後會跌得更甘，可能係消息後出貨，亦可能係維穩期完結平倉。事實上，今年港股形勢大好，根本唔使托都會升，維穩論反而令七一後有「逆維穩」風險。

https://www.facebook.com/bigricetea/

掌握財經生活資訊，即Like「蘋果ATM」fb專頁啦！
http://fb.com/appledailyatm