《大樂師．為愛配樂》女主角顏卓靈(Cherry)聯同導演馮志強噚晚到奧海城出席優先場嘅謝票，其他演員鄭中基、白只都未有出現，不過，Cherry同男友白只相信係拍攝《大樂師．為愛配樂》時，已經結下不解之緣，Cherry話：「拍呢套戲嗰時我哋未拍拖，係第一部戲同佢合作，係嗰時先認識，係惺惺相識。」之後被記者追問係咪因為呢套戲而愛上對方，佢即刻好尷尬咁話：「無特別呀！我唔回應你o依個問題。」

不過，Cherry主動提到喺戲中因為被綁票，同白只雙雙墮海：「我哋兩個原本係唔識游水，所以墮海嗰時，係真心叫救命。導演仲叫我哋Hold 7、8秒，點知幾秒都撐唔住。」因為咁樣佢兩個就去學游水，佢話：「不過而家我連潛水牌都考埋喇，佢都識游水喇。」拍《大樂師》，Cherry除咗學識游水，仲學識彈琴，佢話：「接呢部戲嗰時我係唔識彈琴，戲入面仲講我識作歌、寫歌，咁我咪即刻搵人學，就係咁，點知培養出彈琴嘅興趣，到o依家我都繼續學緊。」

更多娛聞，喺晒《娛果》
http://fb.com/appledailyent