【新增影片】

德甲班霸拜仁慕尼黑禮拜二晚喺歐聯B組分組賽主場贏大部分時間只係得十人應戰嘅安德列治，當主隊教練安察洛堤喺78分鐘、球隊領先兩球嘅情況下，將列貝利換出嘅時候，呢位法國中場心情差到爆炸，除咗慢吞吞咁行出場之外，亦都無同安察洛堤握手，仲掉件波衫。肥安賽後話，完全唔知道列貝利個腦諗緊乜。

安察洛堤賽後仍然大讚列貝利嘅表現：「我唔係因為列貝利嘅表現差換走佢，其實佢踢得好好，不過比賽只係淨返十分鐘，我哋控制大局，列貝利之前又有啲問題，禮拜日無練波，所以我先畀佢唞下。我唔知佢諗緊乜，要問下佢至得。佢肯定係唔開心㗎喇，但佢已經有黃牌喺身，我至畀佢唞唞，佢其實係踢得好嘅，可能佢無咁諗喇。」