當年今日
關於我們

【鬥智鬥力】尚連奴讚「好波」 華仔難忘練靶場拍攝

蘋果日報 2017/08/20 13:36

劉德華俠盜聯盟尚連奴

由馮德倫(Stephen)執導、劉德華監製兼主演嘅冒險動作片《俠盜聯盟》下個禮拜四喺香港正式上映,賣點之一落喺飾演俠盜之首嘅劉德華,同擔任警探嘅國際影星尚連奴(Jean Reno)連番鬥「戲」。
對於同尚連奴首次合作,華仔話:「尚連奴係一位出色而真誠嘅演員,合作過程係非常舒服自然,更可以透過今次嘅機會得以了解其他國家演員嘅表演文化。」對於尚連奴(Jean Reno)形容今次兩人合作係「一場棋逢敵手的網球對決」,華仔亦認同話:「因為戲中我哋嘅演技交流,就好似網球賽嘅球來球往,希望可以擦出新嘅火花。」
戲中二人身份對立,華仔表示當中喺練靶場嘅鏡頭最難忘。「因為嗰場戲需要一個鏡頭到尾,無論對白節奏同對鏡頭嘅掌控都要絲毫不差,所以同尚連奴為此不斷排練,而每次大家嘅即興發揮又可以有新嘅衝擊。」
《俠盜聯盟》拍攝時需要長時間喺歐洲取景,整個劇組遠赴布拉格,舊地重遊嘅華仔表示:「今次由於係工作關係,所以冇太多觀光時間,只係借少許私人時間外出偷閒,亦感謝認出我嘅途人給予足夠空間,可以放鬆一下,總括都係一個唔錯嘅經歷同旅程。」