黃成智(圖)上月被革除出白鴿黨後,至今對事件耿耿於懷,噚日同傳媒茶敍時,就難忍自爆內情。黃成智同八方講,當日其實獲7名黨友力撐,投反對票唔支持革佢走,包括何俊仁、張文光、單仲偕、吳永輝、徐漢光、蔡雨龍同周錦紹,至於當日離港冇投票嘅楊森,亦曾喺黨內兩次發信,呼籲黨友唔好革走佢。
點知去到最後關頭,曾經話過唔會支持革佢走嘅黨副主席尹兆堅,喺黨主席卿姐積極「拉票」游說下,決定「含淚」投票支持革走佢,咁先至令佢因為一票之差被革出白鴿黨喎。
黃成智話,對卿姐拉票革走自己感到好失望,話唔知係咪同佢多年拒撐卿姐出任黨主席有關喎。