各位市民，各位朋友：
我喺一個鐘頭之前，向中央政府遞咗辭職信，請求辭去特區行政長官職務。
我請求辭職，係因為健康理由。因為長期以來，向住北面，我跪得太多、太耐，最近我同啲同事講，可唔可以扶我企番直，喺未來兩年幾，好似一個人咁企喺處施政。點知我啲同事話：董生，你跪咗咁耐，𠵱家先至想企番起身，太遲嘞，醫生話我同好多愛國人士一樣，患上咗下半身骨質疏鬆症，呢隻病，係長期腿骨同膝蓋骨摺埋扭曲所造成。
我覺得若果咁樣落去呢，我施政嘅判斷力會受到影響，從此我一企番直，就會好攰，好攰，所以聽咗醫生嘅意見之後，我決定都係辭去行政長官呢份工，上北京做政協副主席，因為呢個職位啱我啲。
將來我唔喺行政長官呢個位置上，我都希望全港市民，要警惕一啲港英餘孽干擾香港嘅穩定繁榮。我喺任內，得到好多愛國人士及政黨協助，雖然成功咁拆除咗好多港英留低嘅地雷，包括陳太、公務員制度、英語精英教學，不過，港英嘅地雷，係千千萬萬年都拆唔晒嘅。我希望香港人將來一齊努力，繼續掃地雷！