美股爆升，港股高開後倒跌，反映港股弱到不得了，美股一破頂，資金寧派貨搬去美股狗衝，形成美股港股單日背馳嘅現象。

單睇過去5年走勢，有兩段時間，美股升、港股跌嘅背馳日子持續到3個月左右，分別係2013年第一季，同埋2016年第四季，背馳3個月後，港股最終都能夠交出至少一個月追落後嘅升勢。

另外，由今年2月開始，美股同港股似乎間歇出現單日背馳現象。記得上星期二，當日港股跟隨美股升勢先高開28點，然後倒跌182點收市，人氣二三線股亦急回。殊不知，當日港股收市後，美股當晚冇異樣，繼續升，投資者發現上周二港股跌市係「錯價」，之後一日嘅上星期三，港股二三線股重新pick up升勢，報返仇有餘。

無論中線定短線，港股間中會出現同美股升市背馳嘅現象，但往績顯示，港股及後總有一定程度嘅修正反彈。

美股道指噚晚升超過300點破頂之後，港股今朝升超過300點，升幅午後完全蒸發，仲要倒跌，然後期指收市大低水89點。即管睇吓聽日港股會唔會出現反彈，應驗嘅話，日後遇上同一情況，都可以考慮博投機短線反彈。

晉佳

掌握財經生活資訊，即Like「蘋果ATM」fb專頁啦！
http://fb.com/appledailyatm