自從北京公佈《粵港澳大灣區發展規劃綱要》之後，港官同建制派齊齊大合唱唱好大灣區，仲叫年輕人去大灣區發展，當時好多人提出內地稅收比香港重，改革稅制後返大陸做嘢隨時要交大陸稅，好多港官同建制派拍晒心口，話會爭取「港人港稅」，但事實隨時係大陸要嘅人才先有「港人港稅」，諗住上去發展嘅香港普通年輕人，就冇得優待。

只限先進技術高端人才

北京國務院新聞噚日舉行《粵港澳大灣區發展規劃綱要》記者會，之前財經事務及庫務局局長劉怡翔講過大灣區「港人港稅」安排有機會喺2022年前實施，不過出席記者會嘅廣東省常務副省長林少春就話，冇錯佢哋係研究畀內地就業、創業嘅港澳青年居住、醫保、稅務支持措施，當中有稅務優惠，但林少春講明稅務優惠只限先進技術同先進服務業嘅高端人才，言下之意就係唔係個個去大灣區年輕人受惠，只有佢哋要嘅人才先有！雖然唔知林少春所指高端人才去到乜水平，但正如一啲專業人士話，叫得高端人才都唔憂冇工，使乜一定去大灣區？有機會去美國、新加坡仲好發展。