香港28任港督之中，以第25任港督麥理浩任期最長，足足做咗近10年半，比任期第二長嘅葛量洪多12日。原來麥理浩本來只係可以做多葛量洪3日，不過喺1982年4月18號，即係原定離任之前嘅11日，高佬麥喺粉嶺別墅度假時突然唔舒服，要送入伊利沙伯醫院檢查。
港督有病，入院過程好大陣仗，高佬麥唔係坐白車，而係同夫人一齊坐住港督座駕，由警方派出10名交通警開路護送，沿途交通燈全部變晒綠燈，確保入院路程暢通無阻。經檢查之後，證實高佬麥輕微中風，瞓咗六日先出院，搞到遲咗九日先離開香港，喺5月8日返祖家。2000年麥理浩喺家鄉蘇格蘭病逝，享年83歲。