【數臭設計師男友之後】29歲女拳手Hazel突然認錯:我完全沒有數臭對方的意思
Hazel
一直唔介意以戀情增加個人曝光率嘅29歲G-1女拳手唐紫睿(Hazel),舊年情人節公開戀情,大晒任職室內設計師嘅男友Louis包下電車漫遊過二人世界,仲俾埋分數話男友值95分。
前晚,Hazel喺社交網貼出「淚眼」照,話自己遇到呢個世界上最差嘅男人:「這個世界上最差的男人,就是分手了,他也一直只說着你的不對,從來沒想過你的付出…P.S我單身了…」哦,即係分手,結束年半短暫情緣。
之後Hazel受訪時,仍難掩心痛,以短訊回覆稱,因為自己長期喺大陸拍劇,男友變咗,對佢好冷淡,男方仲搬走埋——哦…Hazel仲解釋:「以後都唔會再放閃,之前係佢想曝光,o依家我變咗笑話,諗住佢係結婚對象。」
今午兩點半左右,Hazel突然於fb寫道:「兩人分手,雙方面也有錯,我是不應該太高調公開戀情的(以後我一定會收埋收埋),因為我工作關係,導致而家分手雙方都承受巨大壓力(我完全沒有數臭對方的意思,媒體報道可能會令大家誤會),這點我深感遺憾與抱歉......
「我知道我們都會很快走出陰影,我們愛過也珍惜過對方,可惜最後都唔work,希望他早日找到對的那位⋯⋯
「P.S而我會很快站起來,準備迎接各位單身男士的熱烈追求.....多謝各位關心我們的朋友......」
Hazel噚日以短訊講咗乜,詳見呢度: http://bit.ly/2ryGVXt
噚日話對方差勁,但今日Hazel忽然轉口風,話無意數臭對方。