41歲陳展鵬日前宣佈封盤，將於下月迎娶28歲女友單文柔（新聞連結： https://bit.ly/2NhZjUt ），呢幾日都講咗唔少「鵬單聯婚」嘅內幕，包括單文柔爆男方二度求婚先成功（新聞連結： https://bit.ly/2xeJJ1B ），而陳展鵬亦講到拍拖兩年拉埋天窗唔算閃婚（新聞連結： https://bit.ly/2QjIVAz ）。

「鵬單」接受周刊訪問時仲講到兩人相處半年左右已經認定對方，單文柔坦言結婚日期比預期早，亦擔心婚後要立即生B做媽咪，但陳展鵬喺訪問中大派定心丸，話會順應未來老婆心意，先過二人世界，佢自己只希望事業穩定，其他事冇乜所謂。

提到陳展鵬用親手摺成嘅紙製心形戒指嚟求婚，單文柔指求婚鑽戒仍未到手，仲話男方要佢等，亦唔知陳展鵬係咪會求第三次婚，但如果真係會再求，單文柔希望只係得佢哋兩個人，身邊唔好有太多人，因為喺英國嗰陣，喺街上有好多途人「見證」。

而陳展鵬又透露，自己今次搞秘密求婚，除咗事前有好多準備功夫之外，仲費咗一番唇舌o氹女友去試婚紗，而喺出發前嗰日，陳展鵬去婚紗店攞婚紗時，遇上壞電梯，陳展鵬來回行咗20幾層樓，行完已經成身大汗，到第二日出發去英國時，陳展鵬雙腳已經痠痛到連行樓梯都行唔到。事後單文柔知道真相後，覺得好好笑。雖然陳展鵬咁辛苦，但佢話只要女友開心同滿意，自己都會覺得好開心，難怪單文柔咁冧。

精選娛聞，喺晒《娛果》
http://fb.com/appledailyent