周日喺阿聯酋球場上演嘅酋長盃，主場嘅阿仙奴雖然有奧巴美揚先開紀錄，加上新兵丹尼施巴路斯後備入替踢地標戰，但都係以1:2輸咗俾法甲勁旅里昂，仲有拿卡錫迪因傷退下火線，要着保護鞋離開球場。

兵工廠今場都派出幾多主力，包括奧巴美揚、拿卡錫迪、格列沙加同蒙利爾等，近日由皇家馬德里外借加盟嘅丹尼施巴路斯就先任後備，不過早前發生劫車風波嘅奧斯爾同哥拉辛拿斯，就連大軍名單都冇入選到。

阿仙奴雖然攻勢較多，但射手拿卡錫迪上陣只係12分鐘就傷出，要由雷斯尼爾遜入替，不過佢哋踢到35分鐘，終於由奧巴美揚接應米希達利恩右路傳送窩利射入，領先1:0完半場。換邊後里昂積極反撲，穆沙迪比利喺66同75分鐘各入一球，幫球隊反勝2:1。至於廠迷期待嘅新兵丹尼施巴路斯就喺70分鐘入替韋諾克上演地標戰，但表現就唔太搶眼。

至於受傷嘅拿卡錫迪，賽後就見到佢要着住保護鞋離開球場，可幸係未需要扶拐杖離開。另外，盛傳會離開祖雲達斯嘅德國中場基迪拉，今場亦都有入場睇波，其實阿仙奴近日都有同佢扯上關係，唔通真係好事近？