港澳辦同中聯辦夾硬亂釋法，想為干預香港合理化，其間引出唔少護航嘅牛鬼蛇神、回歸22年先至「糾正」中聯辦唔受22條規管，仲話啲香港官員唔識法律㖭，當中一個熱爆護航大將當然係新民黨主席葉劉淑儀，因為連佢2017年選特首時嘅競選團隊都批評，西環向選委拉票違反22條，但當時唔見葉劉澄清，連自由黨榮譽主席田北俊噚日都開po抽擊，話佢本人係基本法諮詢委員會委員，都唔知西環唔受22條規管，點解當年只係二打六嘅葉劉會知？

網民︰區旗應改為紫葡萄

田北俊明顯對葉劉話西環不受22條規管睇到眼凸凸，喺fb出帖反問：「點解我係基本法諮詢委員會但係我唔知？」直言想當年（相信係起草《基本法）嗰時）葉劉只不過係個二打六，如今竟然話一早已知中聯辦不受22條規管，「足足呃咗香港人22年」。

屬開明建制派嘅田少仲話喎，「我覺得最衰係呢啲資深建制派議員，又唔一早幫中聯辦澄清，咁先至係罪魁禍首」。有網民喺田少fb留言加把口：「佢﹙葉劉﹚今日都只係一個恨做特首的二打六」；另有網民指：「 佢（葉劉）推23條嗰時已經知佢份人啦。」仲有網民留言抽水，話葉劉係明知錯足22年都唔出聲，就係為咗唔搶西環功勞，「忍辱負重留畀中聯辦親自澄清」，仲話姐姐真心愛國，抵佢做下屆特首，連區旗都應該考慮由洋紫荊改為紫葡萄喎！

李八方