樂基兒（Gaile）今日喺柴灣擔任ViuTV節目《晚吹—捲上你的床》嘉賓，主持人有火火、崔碧珈同余逸思，佢哋齊齊以睡衣造型示人。雖然Gaile露腿示人好煞食，但崔碧珈用佢對「Big瓜」迫出事業線來對撼，各有睇頭。

節目中，Gaile大談如何面對有報復心嘅情人，佢笑指細個係會有報復心，不過人大咗就諗通咗，佢話：「我冇話要報復，因為每次分手都唔關第三者事，多數係因為性格不合，或者太年輕拍拖，同屋企人、朋友、女朋友嗌交仲激動過同男朋友，當時有報復心理，但瞓一覺，攬住張被喊，喊到眼腫，等自己平靜吓。」

問到o依家有冇同男朋友嗌交？Gaile話：「會有頂撞，但又冇話嗌交，大家一齊做瑜伽，個人都平靜咗，凡事感恩，不過做瑜伽唔會瘦，我越做越肥，因為做瑜伽為健康，所以唔會食沙律，瑜伽係會改變生活態度，懂得尊重別人，最緊要係身體健康。」

以前有冇同前夫黎明嗌交？Gaile話：「有意見不合，但人大咗就唔會浪費時間，會好珍惜同家人、朋友嘅相聚，唔會令自己諗唔通。」問佢聽唔聽得明黎明講嘅嘢？佢話：「我諗我明……（真係明？）其實我唔明，因為我啲中文唔好，好似我拍火火部戲，我拍完都唔明佢講乜，原來佢笑住鬧我。」

問Gaile平時鍾意着咩睡衣？佢話：「之前香港好凍，我就着長袖T裇、短褲、拖鞋、紮起頭髮，唔係今日呢個打扮。」

《蘋果》第十二屆金話梅電影選舉（Golden Plum）又嚟喇!由今日起，請在以下網址（ http://campaign.appledaily.com/goldenplum2017 ）投票，選出心目中的爛片之霸，截止日期係4月6日，賽果將於香港電影金像獎舉行前夕（4月8日）揭曉。