陳奕迅父親陳裘大早前因為涉及一宗受賄案，目前仍被廉政公署調查，對於此事，Eason不欲多言，但卻透露此事亦影響到他的終身大事。

學習與家人談心事
「雖然我有諗過結婚，但屋企發生咗事，等件事過咗再講啦！𠵱家有時間，我會盡量同爹哋、媽咪、婆婆相聚吓。我喺英國讀咗九年書，同屋企人關係好疏離，就算同父母通長途電話，都係講埋啲『今日你食咗飯未，天氣凍着多件衫』嘅瑣碎話，好少會講啲內心嘢，但其實當時我一個人喺英國，最想得到嘅，就係家人嘅精神支持，金錢反而係其次。
「不過，我都慶幸家人送我去英國讀書，等我可以學到咁多嘢，𠵱家到自己出咗嚟社會做事，開始明白到，父母出嚟社會做嘢嘅壓力同忙碌，對佢哋多咗一份體諒之餘，重會多啲去關心佢哋，我重學會多啲同屋企人分享自己嘅內心世界。」

不滿外婆無辜受驚
現時每逢大時大節，Eason都會到跑馬地探望外婆，對老人家十分有心，不過他對部分記者不問情由，便拍攝其家人的照片，卻極為反感。
Eason回憶道：「早排平安夜，我同女友去跑馬地搵外婆食飯，有記者衝埋嚟係咁影我外婆，當時我真係好嬲，因為佢哋嚇親我婆婆。我食呢行飯，食得鹹魚抵得渴，亦知記者都係打份工，但我真係唔想連家人都要承受埋呢份咁重嘅壓力。」