經歷去年七一維穩騷後,RubberBand遇到事業上及友情上史無前例大考驗,喺呢段時間佢哋有出現爭拗同迷茫,最終都係憑彼此間信任捱過最辛苦的兩周,期間寫上最近獲入選金像獎「最佳電影原創歌曲」《心照一生》,成員阿偉話:「呢首歌係代入當時感覺,寫出兄弟間嘅情。」
相隔年半再推出嘅新專輯《Frank》,係加盟東亞唱片後首張大碟,主音6號話:「原本係舊年九月推出,最終延遲到嚟緊4月10號先出,其實『維穩騷』前寫咗一批歌,不過大家似係藝術家脾氣,將啲歌唔要,再寫過。」阿偉透露簽約初期,公司有不停催交歌出碟,點知過咗一段時間後就唔再催佢哋。
以往專輯都會包含事時性話題,泥鯭指今次亦都唔例外,佢話:「今次內容會講神州大地,題材會闊好多,亦都係希望每一個人都要對自己坦白,唔好成為隨波逐流嘅人。」
今次專輯終於達成到佢哋一個心願就係唔用自己個樣做封面,反而係揼本地整成一面鏡,原來背後有一個意思,泥鯭話:「我哋喺街頭搵咗三百個唔同階層嘅人做訪問,問佢哋兩條問題,就係你最憎自己一樣嘢同最自豪自己一樣嘢?其實想藉呢兩條問題令大家可以對自己坦白。」
6號補充話:「我哋搵咗當中95位受訪者相片,收錄喺碟嘅內頁,再加埋我哋4人,而只要大家買隻專輯,當你拎起隻碟,喺碟面塊鏡見到自己嗰樣,就會成為第一百位對自己坦白嘅人。」