華懋集團執行董事及管治委員會主席龔仁心今日與傳媒午聚，接管集團多年，除了九七亞洲金融風暴個個都唔掂個陣無加之外，咁多年來年年加人工。

龔仁心表示：「除了1997年，年年都加人工，絕對唔會少過報紙寫嘅加薪幅度。每年集團周年晚會我就最受勸迎，因為我會講加人工。」他笑言：「邊個拍掌唔夠大聲，自己因住加少啲。但實際上，要平衡各方面因素，例如賺幾多錢。」集團員工3000人，被問今年加薪會否多幅於4%，他回應：「我就唔想講啦!」

有記者問，可唔可以問你一個感性啲嘅問題，他回應：「你問呀，我可以唔答。」記者就問有無掛念家姐龔如心？他回應：「點叫掛住，點叫唔掛住。應該係掛住，日日返到公司見到嘅都係佢嘅嘢。無夢見過佢，我唔發夢架喎。我最掛住佢咩？點解你咁早走呀，留返咁辛苦位俾我。我做醫生咪做得好幾舒服，幾他調，我係要鬧佢。做左幾十年醫生，做熟左，好輕鬆，唔辛苦，突然間咁大變化，最掛住佢，就係鬧佢。但無辦法，上得虎背，落來唔易。上落都難，我想落架，我從來唔想上，唔係我願唔願意交棒，有好多因素。而家仲未穩定，仲係有法律問題。唔可以講接班唔接班，呢間公司唔係姓龔嘅，而家係慈善基金，但又唔係姓龔嘅。所以呢間公司係社會，係大家，你係老闆，我都係老闆。唔存在接班，邊個有能力做，做落去囉！呢個世界上講接班，可能係朝鮮以外，就無！」

蘋果財經，關心你飯碗
http://fb.com/appledailyatm