新年未到，特區雙曾率先拜早年。噚日特首答問大會前，特首煲呔先到主席曾鈺成辦公室歇腳，順道拜個早年，再到六樓同八樓嘅議員辦公室參觀，需知道立法會大樓同新政總一樣，四處都係惡菌，而且空氣質素十分之差，煲呔零設防貿然上門，絕對係以身犯險。

添馬艦淪為病毒溫床，真係問責嘅話，煲呔責無旁貸，若果唔係佢趕住要俾國家領導人剪綵，又點會甩甩漏漏就入伙？不過為咗證明自己決定英明，噚日煲呔參觀議員辦公室時，據講大讚環境好好，又話好多議員辦公室都有開窗，唔怕毒氣積聚啦。
環境係咪真係咁好，用家最清楚。八方聽聞有議員辦事處職員頂唔順污濁空氣，去附近電器舖買空氣清新機，點知店員話冇貨！透露近日空氣清新機好暢銷，唔少喺新政總同立法會工作嘅人，都買番部擺喺office傍身咁話。
煲呔對立法會「毒氣」輕描淡寫，曾主席卻唔敢輕視，噚日主持完特首答問大會後，話要向官員、議員提早拜年，佢話立法會搬新屋後，送兔迎龍最實際係祝大家「百毒不侵」，官員唔好再中招感染退伍軍人菌，議員吸得多「毒氣」，都唔好有乜毛病，大家平平安安做埋餘下幾個月任期，皆大歡喜囉。
煲呔提早拜年，長毛禮尚往來，噚日答問大會掟咗幾粒糖，抗議政府救市不救人，佢唔希罕政府「派糖」，一於年廿六就同煲呔開年！煲呔早前上京述職時冷病，噚日咳唔停，不過呢啲係小毛病，既然獲阿爺充份肯定工作，餘下任期相信唔會政治病腳痛下台，跛腳鴨政府有阿爺撐住，驚乜呀！

mailto:[email protected]