32歲日本男星小池徹平今日喺台灣Neo Studio舉行首場海外fans見面會，吸引近700名fans捧場，舊年佢曾為音樂劇《死亡筆記》赴台，佢話自己對台灣fans嘅熱情印象深刻，因此一直想去台灣搵啲搞作，所以先促成今次fans見面會。

着住黑色西裝亮相嘅小池喺會上以中文問候fans：「大家好，我是小池徹平。」佢又提到噚日抵台時，喺機場感受到fans嘅熱情，佢話自己被圍到根本睇唔到機場係點嘅樣，仲話自己噚晚去咗食小籠包，大讚超好食，仲因此飲多咗幾杯紹興酒。

大會安排fans喺會上向小池發問，有人問佢「建議每天要喝多少酒，才能維持凍齡的外貌？」小池笑言凍齡同飲酒無關，但自己覺得飲酒可以放鬆心情同紓壓，而佢就啤酒、燒酒、威士忌都會飲，到台灣就飲紹興酒。至於佢心力交瘁時，就會揀同愛犬玩。

大會又安排小池同fans玩遊戲互動，其中一名幸運兒獲小池直望15秒，再改個花名，小池成功過關，之後小池要現場以鐵琴演奏歌曲，佢大叫好難，後來重新演奏後過關。另有小池同fans猜拳遊戲，勝出者獲小池簽名海報。

小池喺會上提到，當初與拍檔Wentz瑛士喺澀谷街頭演唱，完全冇觀眾嚟捧場，後來只有瑛士嘅朋友嚟撐場。而佢今日亦有喺現場演唱，佢話自己已經好耐冇攞起結他自彈自唱，感覺超緊張，獲全場熱烈掌聲鼓。

而喺見面會後，小池特別同班fans影大合照留念，又同買咗2,800新台幣（約715港元）門票嘅觀眾擊掌道別。小池今晚6點喺同一地點舉行多一場見面會。

精選娛聞，喺晒《娛果》
http://fb.com/appledailyent