【60歲生日快樂】收到60份禮物勁難忘 陳志雲:希望大家開心生活
陳志雲60歲生日主席萬歲萬萬歲
噚日係陳志雲嘅60歲生日,不過今年生日喺工作中度過,噚晚喺灣仔演出舞台劇《主席萬歲萬萬歲》,佢嘅一班好友王喜、孫耀威、蘇玉華及樂易玲等亦有到場支持。大會特別安排蛋糕為陳志雲慶祝生日,陳志雲爆胡琳秘密送咗一個澳洲裸男月曆畀佢做生日禮物,唔知對方係乜嘢意思,胡琳話:「呢個係慈善月曆,係澳洲消防員同埋啲動物一齊影,自己都收埋咗一個,老公都唔知,o依家佢知道就當係畀一個目標佢。」
陳志雲表示,冇刻意安排生日演出首場舞台劇,陳志雲說:「相信唔會有一個生日比呢個更難忘,噚晚朋友預早同我慶祝生日,送咗60份生日禮物俾我,收到牙刷、面膜、護膚品等,唔知係咪嫌我口臭、皮膚乾,生日願望希望大家開心快樂生活,冇嘢重要得過快樂生活。」
舊同事樂易玲都有出席支持,陳志雲話:「我哋一向冇嘢,之前出席周刊頒獎禮碰面,有邀請佢嚟支持,佢話21號要去同個仔去泰國,今日會嚟支持,完成舞台劇之後,會去台灣休息3日,返嚟又要繼續做嘢同拍旅遊特輯。」
精選娛聞,喺晒《娛果》
http://fb.com/appledailyent