o靚模風光一時，唔少男男女女都希望投身模特兒行列。Game模每年質素都有番咁上下，舊年跑出個ECupBaby劉欣宜，2000年舉辦第一屆時就有長腳蟹之稱嘅謎女郎呂慧儀，但係今年嘅質素就有啲參差，老中青樣樣都有，甚至連疑似電車物體都出動，果然「出眾」。
噚日Sony喺西九龍中心舉行Game模選舉，吸引近200人到場面試，熱鬧非常，好多應徵少女冒住寒風襲港，着住背心短裙出場，堅持港女本色絕不欺場。由於比賽冇年齡限制，亦有唔少另類而且完全唔同agegroup嘅人參加。
排頭位嘅係一身Lolita造型嘅阿Mi，佢自稱參加過唔少模特兒同cosplay比賽，10年前仲差啲俾一間模特兒公司呃錢，年近30歲嘅佢屢敗屢戰，希望可以完成多年夢想。男子組方面，有實際年齡已經36、睇落好有電車男feel嘅劉傑良，佢話自己keep得好，朋友話佢外表後生10歲，仲認為自己外形、歌聲同演藝方面都有優勢，只係口才同體重比較輸蝕……。雖然話各花入各眼，但如果大家好似八方咁，迎面差啲撞到一位毒男，首先唔好講樣子造型，就憑住佢咬住嘅嘴唇同餓渴眼神，出盡力想兜搭記者做採訪，真係令八方O嘴唔知點算好。

Sony負責人唔覺o靚模損形象

混埋大批騎呢應徵者裏面，好彩仲有唔少型男索女。好似做緊模特兒、19歲嘅Cowrie就話，勝出嘅話，對日後發展會有好大幫助；雖然好多人話o靚模冇腦，佢就話自己完全冇負面睇法。20歲嘅Brian係兼職模特兒，佢話模特兒永遠都有一份自信，亦要唔停增值、保持最好狀態，有信心憑外形出眾會贏得出。
Game模選舉負責人項明生同八方講，唔覺o靚模會影響公司形象，相反有話題先可以增加見報率收宣傳之效。今次大會選出15男15女參賽者接受培訓，一男一女冠軍會喺下個月亞洲遊戲展誕生，獎品價值50萬元，包括代言人合約。

mailto:[email protected]