岑麗香（香香）、李佳芯、胡諾言一家三口等今日在中環參與「衝破極限挑戰賽」活動，離巢後嘅香香早前放假返加拿大休息叉電後再次投入工作，心情勁靚，但體型就瘦咗一圈，佢搞笑話：「瘦咗咩？係應肥嘅地方就肥，肥咗你哋唔覺啫，已經冇刻意減肥，可能做多咗運動。」香香都知人人話佢瘦，好努力食嘢增肥，問佢係咪養肥自己準備生仔？佢話：「增肥唔止為呢樣，可以個樣肥美啲，俾人咬下都好。」

至於造人計劃有乜進展？香香笑晒口話努力中：「但唔會同大家講得太詳細，會順其自然，可能呢排冇咁大壓力，多咗時間自己煮嘢食，身體都健康啲，不過嚟緊都係工作，拍廣告、出活動、拍電影。生B就要爭取二人世界，佢直言好期待，九月底去Fashion week當放假，返嚟再努力工作。」

有傳好友鍾嘉欣已誕下第二胎，香香笑容已經出賣喜訊，但就忍口表示：「唔知呀，知都話唔知，我對住塊鏡練咗100句唔知道，有消息等當事人公佈啦。」香香表示不會因此有壓力。

有傳胡定欣不再續約大台，李佳芯大有機會再上位，佢話：「已經好多機會，公司太多劇，同事有機會做主角拍劇試唔同角色，同合約長短冇關，我上年續咗約，冇諗對我有咩得益，有工作就做。」睇個走勢今年成為大台視后大熱人選，李佳芯就話：「獎項因應個人表現，唔代表留（低）就有得攞，獎項同合約時間冇關。」

精選娛聞，喺晒《娛果》
http://fb.com/appledailyent