八十九歲的余婆婆，患眼疾及氣管病，近月又因先後五次跌傷手腳，導致行動困難。余婆婆無法自行往返醫院接受治療，與她相依為命的兒子阿盛亦因病變成殘廢，難以扶助弱母出入。貧病交煎的她，盼有一部電動輪椅代步，急待善長援手。

記者日前探訪余婆婆母子，白髮蒼蒼的余婆婆坐在床邊向記者訴說：「人年紀大，愈嚟愈容易周身唔舒服。早兩日我對眼好痛，睇醫生攞咗消炎眼藥水滴，𠵱家至冇事。但眼痛完之後就輪到氣管唔妥，好多時覺得呼吸困難，連講嘢都氣促。」
余婆婆稱，她平日最喜歡到公園呼吸新鮮空氣，奈何近月不慎多次跌倒，以致手腳受傷，被迫終日留在翳侷的斗室，自然倍感身體不適。「我喺街跌倒三次，喺屋企就跌親兩次，要送入醫院留醫，𠵱家隻左手梗咗舉唔起，對腳就行幾步已經冇力，真係慘！」

兒傷殘難以照顧
余婆婆氣虛體弱，行動不便，需家人照顧，然而與她同住的兒子阿盛，早年患嚴重糖尿病後須把腐爛的右腳切除，平日倚靠柺杖助行，無力照料母親的起居生活。
五十三歲的阿盛坦言﹕「我冇咗隻腳，又有胃潰瘍，幾乎自己都顧唔掂！」阿盛原任職貨車司機，患病後妻離子散，遺下他與年老母親余婆婆倚靠綜援金孤苦過活。