練馬師蘇保羅近期搏殺手風順，近兩次賽事都有馬贏，今季頭馬數目增加至22場，其中七場是四班1400米，佔頭馬總數三成。今期日賽（25日）第三場四班1400米，蘇保羅的「萬利高」重配最佳拍檔潘頓，人馬合作100%上名，擺明車馬搏殺。

第三場四班1400米：「萬利高」上季四歲才首次出賽，在港第二次上陣便贏馬，而Castledale子嗣普遍較遲熟，由此可見當日在四班贏馬，完全是憑質素監生吞。不過此駒其後表現未再進，皆因體質較弱，陣上衝刺力短，並不容易發揮得好。「萬利高」在港唯一頭馬由潘頓經手，而且人馬合作五次，取得一冠兩亞兩季的佳績，今次重返第四班出賽，由潘頓重掌帥印，賽前最後三課快跳都由副練魯柏軒主操，動態相當積極，馬膽不作他想。

第四場四班2000米：「架勢」在376場次跑田草1600米後上得第五，路程嫌短亦跑得接近，而且該仗水準高到不得了，頭馬「飛越峰」其後贏三班賽，而亞軍「駿王」及季軍「開懷大少」翌仗亦順利贏馬，難怪「架勢」之後亦能夠連贏兩場，估計跑長途的實力必足以在三班爭勝，今仗仍跑四班賽好有利，贏面高唱入雲。