【20:43新增回應】

美國影藝學院（Academy of Motion Picture Arts & Sciences）昨日宣布，將會新增多達774名新成員，而呢批成員連同另外接近7000人都有份投票選出各個獎項。未知係咪因為一直被批評太多白人，所以破紀錄將來自世界各地嘅電影工作者都包括其中，更包括有我哋熟悉嘅甄子丹、梁朝偉同劉嘉玲！

今年美國影藝學院公佈新會員名單，當中包括有演員、導演、監製、服裝設計等各種類別，而演員方面，就有我哋熟悉嘅甄子丹、梁朝偉、劉嘉玲、張曼玉、姜文、范冰冰，仲有日本演員菊地凜子同真田廣之。導演類別，就包括香港導演杜琪峯、陳可辛、許鞍華及韓國導演金基德等，製作人施南生亦榜上有名！

施南生今日接受《蘋果》嘅電話訪問，佢話都係今日見到報導至知自己獲邀請：「冇通知㗎，宣佈我先知。當時係有人提名，佢提名時問我同唔同意，嗰個提名人係美國一位Producer Janet Yang(楊燕子)。」施南生話今次入圍證明Academy從善如流，因為之前好多人批評佢哋好多白人、男性多同上年紀嘅會員，舊年已經見佢哋加咗600幾個新會員：「今年有700幾個，明顯地女性、非美國人、多咗好多外國電影人參與。對華語片應該冇影響咁大，成8,000個會員。」

施南生話未有人通知要做啲乜嘢，不過根據朋友嘅經驗，評委會會分好多組別開會，到選奧斯卡嘅時候，唔同組別會睇唔同嘅片，至於會唔會到當地，就要到時再決定。另一個有份入圍嘅甄子丹今日喺微博留言話：「我的榮幸！」

去年獲邀加入奧斯卡委員會、有投票權嘅「阿發外父」潘恒生，今日接受電話訪問，談到今年參與過嘅工作，佢話：「大會會喺L.A.、倫敦、雪梨安排咗戲院，你可以憑委員身份入場睇。或者你唔喺當地，各大電影公司都會寄啲copy去你報住地址，因為佢哋都想爭取多啲人支持投套戲一票。「去片都係睇咗嗰幾套《星聲夢裡人》（LaLa Land）、《月亮喜歡藍》（Moon Light）。最佳導演、電影你都可以投一票，我主要投畀《LaLa Land》。」

潘恒生表示今年加入好多新人，增強頒獎禮認受性：「如果要有投票權，就要入會交會費，第一年佢邀請你係免費，到第二年要投票就要交300蚊美金（約2,342港元），我都交咗。咁大嘅頒獎禮，都應該嘅，個意義同身份較大。」