自立門戶嘅黃成智成立新思維，今日開記者會講改革區議會同立法會，建議每10萬人有一個細嘅區議會選區，全港區議會由18區變8區，立法會5區變8區，區議會主席兼任政務專員，由特首委任。黃成智話，稍後會向政府提交意見，又會搞圓桌會議，凝聚共識。

佢同場介紹新思維成員、32歲嘅廖添誠，大讚對方喺美國讀書、喺大專院校做客席講師，係青年才俊，仲話日後選舉時會多啲帶佢出嚟。八方上網一搵，發現廖添誠上月投稿《星島日報》，題為「佔中遺害及未來形勢展望」，行文用字、邏輯思維好似反佔中大聯盟嘅周融噃。

廖添誠承認篇文係佢寫，指文章係從經濟家角度出發、亦都係身邊做生意朋友嘅意見。有人擔心新思維會鎅走泛民票源，但查實建制派係咪應該更擔心、新思維會鎅走佢哋嘅選票呢？