吳浩康(Deep)噚晚在九展舉行《LISTEN TO DEEP Live 2017》演唱會，阿Deep在舞台上作出多方面努力，彈琴、打鼓、玩結他、跳舞都出齊，想證明俾大家睇佢可以重返舞台，期間佢多次自責過往，並感激家人、公司、粉絲對佢不離不棄，一講屋企人就好洋蔥，超過五度落淚，喊住完騷。

唱出《給愛惜的人》前，阿Deep喺台上話：「今日好多重要嘅人嚟咗，有位好似再生爸爸照顧我嘅人，佢好低調，多謝你，我呃完你你都照顧我，呢十幾年帶大我，對我容忍、包容今日如願以償。」及後重提媽咪離世時感受：「幾愛你嘅人都唔會理所當然留低、陪你、容忍你，重視大家嘅話就要珍惜眼前人。」阿Deep一直感觸哽咽。

鄭希怡(Yumiko)中途出場擔任嘉賓，唱出當年主打歌《相對濕度》，成為人母今時唔同往日，以密實打扮上陣重演舞姿，欠缺當年一份妖氣，囡囡梁浸浸也在台下，第一次聽媽咪上台唱歌。阿Deep話：「最初邀請Yumiko時係想搵齊三T，今晚Mandy都有嚟。十幾歲已經識Yumiko，佢做咗我無數次嘉賓， 出道時候係師姐身份撐我，無論出新歌、打拳、開騷都會嚟，佢前世欠咗我啲乜呢 ？」Yumiko話 ：「我前世欠你好多，呢世嚟還畀你，以前我哋成日都講，我哋乜嘢都冇，淨係有份義氣。」仲多謝台下粉絲將阿Deep帶上台，叫大家下次要送阿Deep去紅館。之後兩人又唱又跳演出串燒歌，包括《活著viva 》、《戒男》、《煞科》、《越夜越有機》、《失憶週末》等等，不過呢個環節Yumiko明顯有啲甩甩地，勝在現場氣氛高漲。

另一位嘉賓係陳思捷，阿Deep介紹對方出場時話：「感激你十幾年無論我遇著咩狀況，都用一個欣賞眼光嚟睇我。」兩人將佢哋近一年Deep nite show擺上舞臺，第一首busking歌就係《眼前一亮》，阿Deep好感觸話：「個busking對我嚟講有好大意義，我最想唱首歌畀三家姐聽，佢已經嫁咗去法國，今日有嚟到，我對佢掛念係有增無減，每次送機都好似切咗我忽肉咁，但我尊重佢，等於佢尊重我愛錫我一樣。」講到呢度阿Deep已經開始落淚，繼續話：「歌手係好需要一個忠實聽眾，家姐成日聽我唱歌，佢會話我聽唱得幾好，有晚我同家姐講，如果你嚟睇我演唱會我會唱呢首歌你聽。」阿Deep再次流下男兒淚。

唱完Busking呢part，阿Deep一臉認真話：「想正式多謝我女友Michelle，呢一年佢好辛苦，好多時佢陪著我東奔西跑，我同佢講我唔知可以做乜嘢，好多謝你陪住我一步一步走落去。」去到握手位時候，阿Deep走落台，見到老闆楊生隨即擁抱他，即刻爆喊，又對老闆鞠躬，並大嗌老豆辛苦哂，再走到女朋友Michelle前唱歌冧女友，Michelle送上深情擁抱。

返回台上後，阿Deep再次多謝屋企人，佢話：「呢一年我已經多謝咗屋企人好多次，想再一次多謝我爸爸，我自己都諗生咗個仔好似我咁都唔知點，多謝爸爸34年來每晚都同我一齊，冇嫌棄我，自己遇到一啲唔光彩事發生，屋企人都係同一個態度，同一份愛對我。」最後阿Deep亦再一次喊住口多謝老闆，對佢充滿信心同支持。阿Deep encore兩首自己經典歌《洗剪吹》及《先入為主》，觀眾無一不曉。

更多娛聞，喺晒《娛果》
http://fb.com/appledailyent