球會爭簽人好平常，但兩間球會差唔多同一時間都宣佈同一位球員就快加盟，又係咩玩法呢？

周中分別踢完歐聯及歐霸外首圈首回合賽事嘅北愛爾蘭聯賽競爭對手連菲特同十字軍，都喺官方twitter話即將簽入前約克城後衛祖殊羅賓遜。連菲特率先喺Twitter話同羅賓遜已經達成協議，仲班埋領隊大衛希利出嚟，指佢好高興可以宣佈新兵加盟，但一個鐘後，十字軍亦喺Twitter話呢位曾為佢哋效力過嘅舊部，已經一早答應重返球會，仲簽咗pre-contract，而且所有申請球員注冊嘅文件，已經遞交上愛爾蘭足總等候批核。

係咪祖殊羅賓遜呢個名字好普遍，其實雙方簽嘅係唔同人呢？睇嚟可以先排除呢個可能性，因為足總確認係同一人，並已經徹查緊事件，希望知道羅賓遜到底簽咗邊間球會。不過再諗下，會唔會係有人冒認係佢身分，同其中一間球會簽約呢？到底邊個真邊個假，相信好快有答案。