韓國綜藝節目《Running Man》(RM)嘅8位成員早前分別去唔同地方包括日本大阪、台灣、蒙古、俄羅斯等地完成任務，任務失敗嘅成員就要去體驗被列入為健力士世界紀錄中最大、最恐怖、位於日本東京嘅富士急鬼屋，當中劉在錫、池錫辰、李光洙、楊世燦及全昭旻因為任務失敗成為體驗鬼屋嘅人選。

節目將於今日播出最新一集，據知5名成員會分成3組，其中一名成員就要自己一個人入去。節目組率先公開預告相，只見全昭旻甫入去鬼屋就被嚇到尖叫及大喊，同平時開朗嘅樣貌好唔同，令其他成員相當擔心。至於公認為《RM》無膽鬼之一嘅李光洙，就驚到唔理跟喺後面拍攝嘅工作人員，仲瞓喺地下唔郁，死都唔行，場面爆笑。