梁漢文喜歡踢波,也喜歡收藏波衫,相熟的朋友都知道Edmond是一名曼聯球迷,所以在二十多件波衫收藏品中有不少是曼聯的波衫,其中五件他最喜歡的,除了曼聯佔上的三件外,亦包括一件商台為配合Edmond出新碟而訂做、印有其名字及寫上十號的波衫。至於另一件就是科健贊助英超聯的愛華頓波衫,Edmond說:「英超聯波衫上面有贊助商個中文名,我覺得身為中國人球迷,好值得收藏。」
「唔會着波衫出街」
但Edmond強調他絕少穿着波衫去街,他說:「其實多踢波嘅人都唔會着波衫出街,因為波衫應該喺踢波時先着,好似我哋明星足球隊練波嘅時候,因為冇隊衫,所以都喺着自己嘅波衫。」
其實近年足球潮大盛,而一些波衫更被人炒至極高的價格,問到Edmond如何分辨真假波衫?Edmond說:「其實最好就梗係去番啲相熟嘅舖頭買啦,我自己都係咁,因為有時真假真係好難分。」
「香港草地唔夠靚」
Edmond對於踢波時所着的波鞋也甚有研究,他最近買了一對朗拿度都着它踢波的波boots,但在港卻無用武之地,Edmond說:「我同山度士都着過呢對鞋踢波,但感覺唔係幾好,呢對鞋要喺最好狀態時候着先得,如果唔係就好容易會整傷,因為香港嘅草地唔夠靚有好多泥,唔似外國嘅草地咁靚,真嘥料!」
採訪:胡比、蔡如育
攝影:陳慧安