由經典韓劇《藍色生死戀》，到韓式心心手勢成為拍照的共同語言，韓國流行文化早已深入港人骨髓。千禧年起女士們開始身陷韓流漩渦，Fion卻看破漩渦後的商機——港女幻想擁有韓國女神的白滑肌，市面上的韓式化妝護膚品牌竟屈指可數！2002年在職場打滾不足十年的Fion決定創業，一個人到韓國傾代理。

「其實早期我係接觸緊唔同韓國公司，後尾發現原來好多牌子都係屬於Amorepacific呢間公司。咦！原來Amorepacific係韓國最大架喎，咁試下啦。」現時已為Amorepacific香港區董事總經理的葉豐盈（Fion）憶述。2002年新婚的她打算從廣州回流香港工作，當時韓國文化主要經歌影視攻港，「偏偏呢，市場上面未有韓國化妝品。普遍消費者都覺得韓國女性好着重打扮，落街買餸都會化妝，所以喺顧客心目中，韓國女士咁重視化妝同護膚，佢嘅產品會好唔錯」。

拖一喼資料赴韓演講三小時

當時Fion不代表任何大公司，僅靠着在消費品公司工作6、7年的經驗，竟獲邀到韓國見面洽談。她花上一整個月時間「做功課」， 「研究返晒市場上嘅銷售渠道、化妝品護膚品消費者購物需求、亦都做市場上嘅品牌分析，有邊啲品牌係成功呢？成功嘅因素係咩呢？有啲咩品牌係失敗呢？失敗嘅原因又係乜嘢呢？」 剪報雜誌素材產品，Fion帶着裝滿資料的行李箱和一個翻譯，飛到韓國即管一試。

事實上，Amorepacific早於90年代已想到開拓香港市場，更派遣韓國管理人員駐港4年，惜未能與歐美日品牌匹敵，一直未能成功打開韓國品牌的市場缺口。直至Fion主動叩門，三小時的講解，公司深信找到一個可信賴的「地頭蟲」，最終交出Amorepacific港澳代理權。經過一番市場研究，Fion決定先引入主打中價產品的Laneige來港，為首個攻港的韓國化妝護膚品品牌，後來陸續引入雪花秀(Sulwhasoo)、etude house、「呂」等。也得慶幸當初韓流推波助瀾。「當年韓風正盛，食住個勢，打正『韓國旗艦品牌進駐香港』嘅旗號。我記得喺百貨專櫃招牌，除咗Laneige，仲將幾個韓文字擺埋喺隔離」。早年《太陽的後裔》女主角宋慧喬用上的雙色漸變唇膏及氣墊BB霜，依舊掀起陣陣搶購潮。

總公司收回代理權

韓國總公司最終於2016年正式收回港澳代理權，對Fion來說這是14年來拚搏的成績表。「唔少國際企業，喺世界各地會以合資或者代理嚟做前期市場開發，去到某一個地步再逐一收購返」。相信總公司有感香港業務已發展得頗為成熟，是時候收割成果。觀乎世界上不少奢侈品牌，Louis Vuitton、Chloé、Burberry等，都陸續把中國或香港區業務由代理形式轉回直營。「合併後集團系統、營運手法、資訊掌握準確度可以再提高」，總公司亦有派員負責管理資訊科技部及財政部，她認為這是一個合理的發展進程。

Fion形容，成為總公司全資附屬公司後，香港營運「如虎添翼」，公司對員工福利更是毫不吝嗇。香港公司總員工數目約700人，為了留住人才及妥善調配人手，今年首次推出30日無薪假及額外40日有薪假，在年中無休的零售業界可謂絕無僅有。

「一間舖頭員工齊心啲，條數都會靚啲」

「（員工會覺得）請no pay leave係唔得，好影響自己工作表現，或者覺得好影響公司點睇自己，影響自己紀錄、升職加薪嘅機會呀等」，為免同事顧忌，公司決定行前一步，推出每年申請最多30日的無薪假，同事不需提供任何原因解釋。Fion說：「有同事老公鍾意去long haul旅行、又有同事仔女入小一想跟緊啲功課、有啲希望發展一下工作以外嘅興趣等。」雖然無薪，卻是打工仔趨之若鶩的福利；另外，額外40日有薪假包括：身體檢查假、遺失銀包證件假、子女畢業亦可申請有薪假參與畢業禮，不用「射波」。

售貨員大部分多勞多得，Amorepacific旗下前線員工亦不例外，薪金結構為底薪加佣金。不過，為免員工之間競爭太激烈，今年公司上調前線員工底薪25%，變相減少依賴分紅，Fion笑言，「一間舖頭員工齊心啲，條數都會靚啲」。事實上，03年沙士時期，香港業務營運未夠一年，生意甚為艱難，公司當年亦推出包佣政策穩定軍心，即使生意額不幸再跌，亦保證員工取得一定佣金。

Amorepacific旗下有約30個品牌，在港知名度較高的IOPE、Mamonde、espoir等目前仍未攻港。香港業務乘「韓瘋」而起，但總不能依靠潮流眷顧。「我哋喺香港17年，韓風都唔係吹咗17年架！」Fion說，公司早已習慣韓風起跌，不能單純靠韓風經營，反而在業務根基上要繼續努力，未來會循序漸進把其他品牌帶來港。

記者：邱曉欣
攝影：譚德潤

影片：
採訪 / 邱曉欣 樊栩瑩
編撰 / 樊栩瑩
旁白/ 蘇承智
攝影 / 陳海威 蕭偉文
剪接、後期 /徐浩軒

investMAN
For People of Style & Substance
掌握理財智慧 感受生活品味
http://facebook.com/investMAN.hk