港股繼續大插，日股大跌3%，落井下石，港股午後跌勢轉急，恒指萬一點大關失守，今次跌市，已可確認係一次到底。
大市跌起上嚟，完全冇位可守，先跌破上一個升浪嘅0.382支持（11870），跟住250日線（當時係11643），之後到升浪嘅0.5倍（11194），噚日亦穿埋，下一個位，係0.618嘅10518。個市跌得咁急，守唔守得住，都成疑問。
二三線股股災終於出現，好多隻都跌十幾二十個巴仙，家下遍地都係好抵買嘅股份，今日呢個「危」，第日就係「機」，可以發達。國企指數亦係大散，跌幅超逾5%，不過噚日跌嘅係早一輪嘅強勢股，好似中石油（857）同中石化（386），都跌咗6%至8%，反而早輪重創嘅原料同石化股，跌勢已見喘定，個別且逆市而升。
留意基金動向
重鋼（1053）表現最勁。上個禮拜四，已經睇到有基金大行係咁吸納啲重災股，好似重鋼，就喺2.6元水平搶咗8至9球。基金入市，唔代表股價唔會再跌（呢兩日都跌得好急），但噚日，佢哋又再出嚟買過，由2.25元一路掃到上2.4元，尾市回番，收2.275元，仍有一個位進帳，成交2800萬股，佢哋應該買咗唔少。國企跌定未，好難講，但已大跌嘅股票，再跌幅度亦會有限，一路留意住基金嘅動向，有助日後揀股，迎接新升浪。