特首林鄭月娥噚日話針對《逃犯條例》修訂嘅「極端言論」都係「廢話」。林鄭競選特首時嘅對手、前財政司長曾俊華(圖)話近期忙住搬屋無留意件事,但就話修復社會撕裂需要包容同埋諒解,亦都要「接受其他人講嘅嘢」,唔知薯片叔叔呢番說話係咪講畀娥特聽呢?
薯片叔叔噚日出席港台頒獎禮後同八方講,自己參與得獎節目《修復時刻》,留意到社會有好多撕裂,要有修復嘅過程,拍攝期間感受很大,尤其係其中一集有關城市設計,了解到「好多嘢係之前遺留落嚟,我哋要珍惜」,近年社會撕裂嚴重,薯片叔叔話最緊要係大家多啲包容諒解,大家走多一步,相信係大家都可以做到嘅事。