周日（25日）沙田編跑十場，三泥七草，草地採用A加三跑道，當中兩場是直路賽，排外檔若唔夠快就容易塞車，排內檔反而有得追。全日三場泥地都跑1200米，天氣正常，始終快放馬佔優。莫雷拉依然手握重兵，但近期表現已難言穩定，切勿過份偏重。

第九場二班草地1600米：「精明才子」運港後適應甚佳，狀態一操即起，初出快活谷1200米僅以頸位敗給今季五捷的「僥倖」，認真犀利。其後轉戰沙田，連場硬拼都上名，忠心準繩，到上仗潘頓做好留放，終打開勝門，取勝姿態輕鬆。今次增程跑1600米，來自「范高爾」一族，長力絕對無問題，復課續進步，身靚毛水深潤，快跳情緒越見集中，最後試跑操罷收慢時，鞍上助手情不自禁拍拍馬頸給予獎勵，可見對其狀態進展極滿意。今次升班減負輕磅，憑當起之銳，絕對有力一撼強敵。

對手方面，「東方快車」終於贏番馬，復課繼續拍跳及試閘，身靚體力充沛，由愛將杜利萊執韁，可爭入前列。「得勝駒」來港後好適應，能一出即勝，質厚馬不斷進步，回配莫雷拉，加眼罩有正面幫助，爭勝主角。「勝利導航」是巨人殺手，跑出水準可挑戰任何強敵，上仗演出失準，然復課受操，身靚拍跳好爽，這類馬冷敲熱避為妙。