日本著名球星中田英壽喺北京出席完時裝品牌活動後，日前嚟咗香港，佢入住咗九龍嘅W酒店，今次佢嚟港主要係約咗BMA老闆羅傑承傾合作嘅事。前晚七點幾，羅傑承揸住部價值360萬嘅黑色林寶堅尼同老婆梁芷珊抵達中環四季酒店，相隔唔夠五分鐘，壽仔就同三個男性朋友坐住架七人車抵達，一行人入咗去中菜廳食飯。

同羅傑承飯局

呢餐飯壽仔同羅傑承都食得幾愉快，不時見佢哋碰杯暢飲，大約食到10點，成班人就陸續散去，不過壽仔好似好趕時間咁，喺酒店門口同羅傑承兩公婆講再見後，佢就同其中兩個朋友搭的士去中環蘭桂坊酒店，當佢去到目的地後，自己就一支箭上房，留低兩個朋友幫佢畀的士錢。唔知壽仔咁急上房搞乜鬼呢？
噚日馮仁昭打畀BMA集團行政總裁阿Sam（崔永昌），問佢壽仔同羅傑承有乜合作，佢話：「佢哋會合作搞球賽，另外中田英壽喺日本間潮流公司，都會同羅生合作搞啲嘢，到時可能仲會同無綫一齊搞個模特兒選拔賽，冠軍有機會送去日本，交畀中田英壽間公司安排發展。」
同壽仔開餐後，羅傑承噚日凌晨時分就喺南華足球隊官網度，張貼佢同太太同壽仔嘅合照，仲留言話：「我趕赴與中田英壽晚膳，他大談了不少JLeague球隊和意大利球隊管理上的分別，相信各位都有興趣知道，明天再談。」