韓馬利同魯振順今日喺佐敦為代言嘅補健產品出席分享講座，佢哋透露拍劇經常令到身體遍體鱗傷，魯振順話：「有場戲係跪喺度，點知跪喺好尖嘅石春上面，關節好痛，帶咗護墊都冇用，所以做呢行真係有苦自己知，痛到喊住嚟做。」佢哋又指今次擔任代言人係收友情價。

問到平時有冇做運動？佢哋表示會做拉筋動作，有跳舞底子嘅韓馬利就話：「人越老，筋越縮。」佢閒時會食補腦產品、魚油丸等等。身體保養得咁好，係咪冇諗過退休？魯振順話：「我哋好熱愛工作，不過太辛苦嘅事就唔好預我哋喇！」韓馬利笑指吊威也就留番後生去做。