冠一突然心血來潮，想講一個故事給大家聽。
從前港英金融市場有位名人，用自己個christianname設立一個基金，專門幫客人炒外滙。初時賺到盤滿缽滿，喜悅之情溢於言表，所以在一次飯局中向友好炫耀一番謂：「真係無得頂，連餐館夥計甚至阿嬸都識問我英鎊、馬克點睇？你話開唔開心？」
席間有一高官不以為然，並冷冷地說：「唔好開心得太早，如果不幸唔就手，第日見番佢哋，到時唔係問你英鎊、馬克點睇，而係問候令壽堂！」即時惹來哄堂大笑。最終結果怎樣？短期間成個基金輸到要「摺埋」囉！
港人常被譏為短視、急功近利，其實這亦無可厚非。因為香港沒有西方國家般提供的社會福利，正是手停口停、樓價貴、租金貴、交通費又貴，一旦失去賺錢能力，你話點算好？故此，「搵快錢」已成為風氣，或曰生活的一部份。君不見金魚缸、投注站等，周不時人頭湧湧乎？
雖然如此，但人有時還應安守本份和必須有自知之明。為甚麼筆者今日要講這個故事，就是見近日有所謂從事教育工作者，居然教人炒股票，教到意氣風發。在學生畢業禮中，一眾家長不是問自己仔女的將來或出路，卻是向「教授」問買邊隻、沽邊隻股票，而後者更以此自豪，自傲至樂極忘形，做區議員收人工又未聞有何貢獻，只自吹自擂炒股票點叻。
筆者也從事教育工作，很多年前已在內地教MBA，無論在中港澳與學生傾談時，必多講書本知識，分析世界大事和交流做人道理，當然也有涉及金融市場事宜，但絕不會以此作為「出位」之伎倆！