呢期《海嘯救生圈》嘅手風唔係咁順，既然係咁，一於拗吓氣，揀兩支聯賽榜首隊禾夫斯堡同埋美國芝華士都喺周六嘅賽事失分，只能和波，再串瑞超艾夫斯堡開「大」，作混合過關3串4先。
點解揀德甲嘅漢諾威可以打和榜首嘅禾夫斯堡？好簡單，皆因唔覺禾夫斯堡有冠軍相，而且呢隊波作客表現麻麻，漢諾威今季主場又勁，喺聯賽淨係輸過一場咁大把；加上攻擊球員好似布真克同埋巴列殊等又「弗」，一於冷敲和波，有3.9倍。至於美國芝華士目前喺美職聯可以居首，更加係異數，因為呢支加州球隊傷兵一籮籮；不過，佢哋喺周六迎戰韌力十足嘅華盛頓聯隊時，相信係失分嘅時間，芝華士唔單止有中場主力基捷斯坦停賽，而華盛頓話晒都係東岸「1哥」，和波合理。