韓國女子組合少女時代成員Jessica噚晚喺銅鑼灣I.T出席活動，約500名粉絲一早重重包圍舖頭，好多校服都未換就到場，粉絲逼到出馬路，有啲爬上馬路欄杆高眺，搞到警察拉起警戒線同封咗一支交通燈嚟維持秩序，售貨員都築起人鏈，以防粉絲逼爆櫥窗玻璃，有粉絲採取遠攻，企喺對面馬路，連舖頭對出嘅安全島都唔放過，啲車喺身邊擦過，都幾危險。

Jessica比原定時間遲咗半個鐘先出現，行落樓梯時工作人員喺旁邊用衫遮實下身防走光，Jessica著住U領背心裙，晒Y形事業線，明益苦等嘅粉絲，雖然有玻璃之隔，粉絲依然嗌到拆天。

Jessica全程用英文作答，一開口就多謝邀請佢嚟，司儀問佢再嚟香港嘅感受，佢話：「第一次獨自嚟做時裝活動，感覺唔同。」嚟香港想做乜？佢話：「想食點心同地道食物，感受香港文化。」想購物？佢話：「當然，我真係好鍾意，多謝歡迎我嚟。」佢影相時友善咁揮手，之後同品牌設計師同造型師喺絲巾上簽名留念，前後逗留咗只係5分鐘！

Jessica離開時勁識做，行番上樓梯時停低，向正門外嘅粉絲甜笑兼揮手，仲送咗兩個飛吻，粉絲應該收貨啦。



逢周五隨《蘋果日報》附送嘅時尚美容雜誌《add》第二期已出版；拎唔到書嘅朋友，可以上番《add》嘅官網 http://hk.add.nextmedia.com/睇番足本網上版，除咗有陳慧琳訪問，仲有好多時裝靚嘢睇！