遇舊愛扭扭擰擰
馮仁昭四圍超:阿Don難忍翠翠撩仔 黑面 - 馮仁昭

蘋果日報 2007/02/16 00:00


葉翠翠同李逸朗(Don)呢對過氣情侶,前晚情人節又喺無綫將軍澳電視廣播城相遇,不過女方就表現得大方好多!
話說翠翠前晚錄影《香港高飛慶團圓》時,咁啱舊愛阿Don喺隔籬廠做緊《勁歌金曲》,兩人用埋同一個化妝間,記者想捉佢哋合照,翠翠大方答應,仲專登走過去阿Don嗰邊,不過阿Don明明化完妝,但就話:「我要化妝呀!等陣先啦!」明顯唔想同翠翠合照,搞到要個女仔企喺度等一輪,真係尷尬!
其後翠翠等得唔耐煩,返番自己座位時,即刻同高鈞賢玩到好開心,阿Don行過睇到又即時黑面,唔知係咪唔鍾意見到舊愛同其他男藝人玩呢?就喺呢個時候,記者再要求佢哋合照,呢次避無可避,阿Don就懶大方咁同翠翠影合照啦!不過佢哋一影完就彈開,又異口同聲話好少聯絡。
另外,容祖兒前晚做《勁歌》嘉賓,佢話:「情人節都係工作中度過,到𠵱家都未收到花。等陣收工會返屋企同阿媽打邊爐,呢排我都係忙緊處理屋企嗰幾隻貓,因為最細嗰隻有皮膚病,搞到其他四隻都受感染。」