當年今日
關於我們

偕郭晉安搵睇相佬
胡杏兒香閨擺陣谷星運

蘋果日報 2004/08/06 00:00


郭晉安及胡杏兒日前為無綫新劇《同撈同㷛》拍攝一場往看相的戲份,雖然兩人對風水命理都不太盡信,但杏兒卻表示早前家中擺放了一棵八呎葵樹,即令她事業「衝上雲霄」,目前她家中又換放了另一棵八呎多的樹,希望令星途更順暢。
郭晉安、胡杏兒、江芷妮及馬國明等日前於鯉魚門為無綫新劇《同撈同㷛》拍攝外景,吸引不少居民圍觀,劇中郭晉安與胡杏兒雙雙往看相,安仔說:「我本身唔會好信,只會做個參考,通常都係我屋企人幫我,跟住佢哋就會叫我幾時要小心啲揸車同注意健康。」

怕早知天機
胡杏兒在劇中的前世為金絲雀,而安仔則是位官員,今世兩人再相遇。胡杏兒同樣表示甚少看相,她說:「每年都只係會睇吓運程書,但好少特登搵人睇相,我怕太早知會擔心。之前屋企人搵人睇風水,叫我放棵樹喺屋企我先放,之後再換咗棵八呎葵樹,拍《衝上雲霄》工作都好順利。𠵱家我又換咗另一棵八呎幾嘅樹,未知成績會點。」

揹起江芷妮
首次與郭晉安合作,胡杏兒十分欣賞對方,她說:「佢啲演技好好,做對手戲好易令我投入角色。」劇中以六、七十年代為背景,故無論化妝及服飾都令杏兒愛不釋手,她說:「我好鍾意啲服飾,因為我覺得女仔着旗袍好靚,所以我為咗可以着得靚啲,都唔敢亂食嘢。」
此外,郭晉安和江芷妮昨日再在西貢為《同》劇拍外景,講述江芷妮扭傷腳要郭晉安揹她,幸好她的體重只有一百一十磅,郭晉安都不會太過辛苦,江芷妮說:「拍呢啲劇情,我盡量唔NG,對手都冇咁辛苦,我會請安仔食嘢慰勞吓佢。」
採訪、攝影:王崇穎、卓寶花
empty
左起:郭晉安、胡杏兒及馬國明齊齊拿着劇本綵排新劇。
empty
為了不讓郭晉安揹得太辛苦,江芷妮表示會盡量減少NG。