香港迪士尼年初因擴建城堡，煙花匯演暫別樂園。迪士尼噚日宣布舉辦橫跨春夏兩季嘅「迪士尼巨星嘉年華」，當中迪士尼首創嘅「We Love Mickey!」大街投影盛演，會透過嶄新嘅視覺特效同晚間燈光效果，每晚將美國小鎮大街幻化成米奇星光大街，除展現米奇黑白經典造型、瘋狂有趣嘅一面，米奇更會盛裝現身。迪士尼三間主題酒店亦會喺復活節檔期舉辦戶外嘉年華，遊客亦可以喺客房「尋蛋」，將迪士尼花蛋帶番屋企。

迪士尼又預告，「加利布尼市集」會喺今個月30日，在探險世界「原野劇場」旁開幕，提供多款互動遊戲。而首個擴建計劃娛樂項目、全新舞台表演「魔海奇緣凱旋慶典」亦會喺5月登場。「大街水花派對」亦喺今年夏天推出，《超人特工隊》同《反斗奇兵》角色沿美國小鎮大街表演，到時仲會水花四濺㖭！