當年今日
關於我們

娛圈360:40經典電影對白

蘋果日報 2009/09/27 00:00


如果編輯可以畀我遲啲交稿嘅話,我會同佢講多謝佢;如果係都要喺deadline加上一個期限,我希望係一萬年。講番正題,本報娛樂版嚴選40句港產經典對白,李小龍在《精武門》為全中國人爭氣的一句「中國人唔係病夫」,字字鏗鏘,振奮人心,至今無人不曉,大熱登上經典對白No.1。對於這金句傳誦至今,倪匡昨日只對記者說:「寫嗰陣冇諗過會有乜影響,亦都冇刻意去度,只係隨住故事需要諗到就寫。我寫過幾百個劇本,邊記得咁多?」 撰文:蘇芬妮
1
中國人唔係病夫!(陳真)

陳真帶着東亞病夫匾額,單挑虹口道場,打到班嘍囉一仆一碌。東亞病夫?同我吞咗呢幾粒字佢!
—《精武門》(1972)
empty
2
「曾經有一份至真嘅愛情擺喺我面前,但我冇去珍惜,到冇咗嘅時候先至後悔莫及,塵世間最痛苦莫過於此。如果個天可以畀個機會我返轉頭嘅話,我會同個女仔講我愛佢;如果係都要喺呢份愛加上一個期限,我希望係一萬年。」(至尊寶)

至尊寶戴上金剛圈,前塵世事化為一縷青煙。
—《西遊記大結局之仙履奇緣》(1995)
empty
3
「我不嬲講嘢都咁大聲,我大聲講嘢唔代表我冇禮貌!」(鍾天正)

監犯也是人,也有人權,周潤發為他們出了一口氣。
—《監獄風雲》(1987)
empty
4
「你話三年。三年之後又三年,三年之後又三年!十年都嚟緊頭啦老細!」(陳永仁)

陳永仁被黃Sir推入無間地獄梗係火。柴九話人生有幾多個十年,但又有幾多個三年可以蹉跎?
—《無間道》(2002)
empty
5
「食碗面,反碗底!」(朱為仁)

雖然後世將碗面碗底重組,變成更多騎呢版本,但依然是吳楚帆這金句最為經典。
—《香港屋簷下》(1964)
empty
6
「你快點回火星吧!地球是很危險的。」(五師弟)

趙薇剃光頭請纓代少林足球隊上陣,星爺笑她似火星人都算厚道。
—《少林足球》(2001)
empty
7
「1960年4月16號下晝3點之前嘅一分鐘,你同我喺埋一齊。因為你,我會記得嗰一分鐘。由家開始,我哋就係一分鐘嘅朋友。呢個係事實嚟,你追唔番,因為已經過去咗。」(旭仔)

張國榮教曉大家最直接的媾女秘技,相信條橋喺地球毀滅之前仍然work。
—《阿飛正傳》(1990)
empty
8
「唉,女人真係茶煲。麻煩呀,trouble!」(船頭尺)

導演用「茶煲」來帶出船頭尺的草根味是神來之筆,茶煲更成為了當代潮語。
—《秋天的童話》(1987)
empty
9
「萬佛朝宗~~~」(龍劍飛)

曹達華意外悟出如來神掌第九式,拿拿聲使出對付三絕掌。
—《如來神掌》(1964)
empty
10
「我衰咗三年,我等緊個機會,爭番口氣。唔係要證明話畀人聽我威,只係想話畀人聽,我唔見咗嘅嘢我想自己攞番!」(Mark哥)

吳宇森愛說教,黑幫電影都唔例外,這句經典成為無數港人的座右銘。
—《英雄本色》(1987)
empty
以下金句,排名不分先後
「魚蛋亦都冇魚味,但係你為咗掩飾,專登加啲咖喱汁將佢做成咖喱魚蛋,但係咁做太天真,因為你煮嘅時間唔夠,咖喱味根本只係喺表面,而冇入到裏面,掂到湯之後仲要冲走埋。好好哋一粒咖喱魚蛋,俾你整到冇魚味亦都冇咖喱味,失敗!」(食神)

食神對着雞姐碗嗱喳麪一輪嘴狂噴,邊個話雞一定有雞味先?
—《食神》(1996)
「闔家鏟泥齊種樹,汝家池塘多鮫魚,魚肥果熟嫲撚飯,你老母兮親下廚!」(唐伯虎、對穿祥)

唐伯虎一句語帶雙關的貴親下廚,對穿祥應聲倒地。
—《唐伯虎點秋香》(1993)
empty
「你睇我唔到!你睇我唔到!」(賭聖)

賭聖用特異功能隱身避過賭俠視線,三叔想有樣學樣?梗係冇運行啦。
—《賭俠》(1990)
empty
「錯,呢支唔係普通嘅電筒,呢支係唔使電芯嘅太陽能電筒。喺有光源嘅時候佢會着。(咁如果冇光?)係絕對唔會着。只要攞另一支電筒出嚟照住佢,佢就會着嘞。」(聞西)

除太陽能電筒,聞西還發明「攞你命三千」。
—《國產凌凌漆》(1994)
empty
「就算係一張廁紙、一條底褲都有佢本身嘅用處o架嘛。」(司令)

淪為豬肉佬的凌凌漆受國家委託,換來竟是司令的冷諷。
—《國產凌凌漆》(1994)
empty
「阿Sir,我冇做大佬好耐啦!」(豪哥)

豪哥從良但不獲細佬杰仔原諒,一句語帶雙關的對白,大佬真係唔易做。
—《英雄本色》(1987)
empty
「唔好搵支槍指住我個頭呀!」(Mark哥)

Mark哥寧願死都唔會俾人用支槍指住個頭,有guts。
—《英雄本色》(1987)
empty
「我係差人。」(陳永仁)
「邊個知呀?」(劉健明)

卧底陳永仁要攞番差人身份,犯險約劉健明到天台講數。
—《無間道》(2002)
empty
「我要打10個!」(葉問)

葉問怒打東洋鬼子,唔使隻揪,一齊上啦,出自全宇宙最好打的甄子丹口中更有說服力。
—《葉問》(2008)
empty
「麥當娜約咗麥當雄去麥當奴道嗰間麥當勞食麥皮撈當歸。」(阿Wing)

靚靚教哥哥念急口令定驚,肯定可以分散注意力。
—《金枝玉葉》(1994)
empty
「我少讀書,你唔好呃我!」(陳真)

陳真讀得書少,但深明大義,不似有人以讀得書少為藉口,做事不負責任。
—《精武門》(1972)
empty
「冇信心就一定會輸!」(李建華)

華仔名言,之後人人跟住講,不過有信心還有信心,冇實力咪又係輸。
—《傲氣雄鷹》(1989)
empty
「我烏蠅寧願做一日英雄,都唔想做一世烏蠅呀!」(烏蠅)

烏蠅唔想一世俾人睇唔起,堅持做單大嘢,華仔勸極唔聽。
—《旺角卡門》(1988)
empty
「放下屠刀,立地信耶穌!」(牧師)

阿叔向山雞傳道,稱耶穌不會出賣你,死了三日又會復活,跟得過。
—《古惑仔之人在江湖》(1996)
empty
「有水有水,冇水冇水;有水過水,冇水散水!」(消防員)

當年消防員冇水真係唔會救火。
—《七十二家房客》(1973)
empty
「8點……有骨氣。」(Long根)

垂死的Long根緩緩吐出大D集會的地點。杜琪峯向同行示範了高手賣廣告的伎倆。
—《黑社會》(2005)
empty
「愛兄弟定愛黃金?」(入會儀式主持)

撈偏行邪,入門儀式尚講求忠義兩字,無奈世上太多人見利忘義,連蠱惑仔都不如。
—《黑社會》(2005)
empty
「我最多怨自己運氣唔好,從來冇懷疑過自己嘅才華。」(戲班樂師)

秦沛一句話燃起劉青雲的鬥志,也令懷才不遇的人重拾自信。
—《新不了情》(1993)
empty
「學名係無定向喪心病狂間歇性全身機能失調症。」(醫生)

星爺患上該病,隨即演繹各種失常病徵,喜劇之王的solo戲。
—《家有囍事》(1992)
empty
「在1994年的5月1號,有一個女人跟我講一聲生日快樂,因為這句話,我會一直記住這個女人。如果記憶也是一個罐頭的話,我希望這個罐頭不會過期,如果一定要加一個日子的話,我希望它是一萬年。」(何志武)

金城武的罐頭宣言,間接啟發星爺創作他的愛你一萬年金句。
—《重慶森林》(1994)
「牌品唔好,即係人品唔好。」(德華)

打牌揀女婿萬試萬靈,唔怪得楊千嬅父第一次見丁子高,都要跟他切磋切磋。
—《嚦咕嚦咕新年財》(2002)
empty
「大家唔好唞氣!」(九叔)

林正英對付殭屍方法獨特,自此套套殭屍片都玩閉氣橋段,玩極都唔厭。
—《殭屍先生》(1985)
empty
「當你唔可以再擁有嘅時候,你唯一可以做嘅,就係令自己唔好忘記。」(歐陽鋒)

明知不能擁有,但又忘不了,此話出自張國榮,更添動人凄美。
—《東邪西毒》(1994)
empty
「一念天堂,一念地獄。」(大隻佬)

華仔在戲中跟張兆輝談「因果論」,現實中這佛偈永遠能應驗在任何人身上。
—《大隻佬》(2003)
empty
「WhoamI~~~~~」(WhoamI)

成龍失憶,欲尋回身份但處處碰壁,一幕衝上樓頂振臂高呼我是誰,觀眾笑他多過同情他。
—《我是誰》(1998)
empty
「有殺冇賠!」(阿全)

秦沛扮演精神病患者,手執兩柄老牛闖入幼稚園喊叫有殺冇賠,為他贏得金像獎最佳男配角。
—《癲佬正傳》(1986)
empty
「你哋呢班馬騮,師傅平時係點樣教你哋?」(黃飛鴻)

《黃飛鴻》電影拍了一大堆,梁寬、阿蘇係都要生事,唔激死關德興就怪了。
—《黃飛鴻》系列
empty
「唔賭唔知時運到,唔滾唔知身體好。」(郭天佑)

曾志偉戲中率領小春等人背妻召妓。從此,去滾都有個藉口。
—《大丈夫》(2003)
empty
「不如我哋由頭再嚟過。」(何寶榮)

張國榮向梁朝偉哀求重新開始,也成為男女面臨分手的終極台詞。
—《春光乍洩》(1997)
empty
「導演呀,陣間我除咗熱之外,可唔可以表現多一種孤獨嘅冷呀?」(尹天仇)

周星馳運用史坦尼夫斯基的方法演技去做娟姐替身。
—《喜劇之王》(1999)
empty