由吳啟華﹑楊怡﹑朱千雪﹑羅仲謙﹑馬國明﹑黃智雯﹑李雪瑩及袁偉豪等主演嘅無綫劇《OnCall36小時II》，開播至今收視未算標青，只能算合格，而且劇集內容遭非議，更有網民更喺facebook開設群組，專門揪出《OnCallII》謬誤，有醫生批評劇集錯誤醫療訊息，會誤導現實中病人，有醫生亦指劇集連基本資料都出事，表面做得幾專業都冇用。

身為主角嘅吳啟華，今晨喺微博有感而發，佢話： 「OCII（OnCallII）播了十集，評論好壞參半，我自己也是追劇觀眾之一，個人覺得編劇真不容易，要交代上一輯人物發展的眾多條線之餘，又加上了新角色發展的另外一些支線，還要處理醫院個別個案，一個處理不好就真像特首那句話：順得哥情失嫂意，不過電視劇嘛是要煲的，相信後面的劇情會更精彩！你一定要支持啊！」

今日有內地傳媒刊登咗一篇吳啟華專訪，亦談到《OnCallII》種種，吳啟華不諱言最鍾意嘅角色仍然係《妙手仁心》嘅程至美：「如果一定要將兩個角色比較嘅話，我會覺得程至美更好，佢嘅性格好完美，相比之下洛文笙有好多缺點。」

啟華又大讚馬國明同楊怡非常勤力，比之前初次合作嗰成熟咗好多，亦都好勤奮，每次開拍時對白都背到滾瓜爛熟，做足功課，但佢都好坦白咁話對劇本唔係太滿意:「今次返嚟拍劇，覺得士氣重振咗，監製亦特別體恤演員，會儘量安排休息時間，真正辛苦嘅就係一兩日，拍一個通宵接早班。 當然都有缺點，好似話劇本冇我期望中咁好，我已經盡力去挽回，對一啲唔合適嘅地方會提出刪改，有啲戲甚至係自己郁手寫劇本。其實呢個唔係無綫嘅問題，全世界無論係拍電影定係電視劇，劇本都係首要解決嘅難題。 」