買倫敦樓 - 左丁山

蘋果日報 2017/06/05 00:00


自倫敦來港工作近20年嘅英國人阿爾拔最近與女朋友返鄉下探親,左丁山問佢:「住酒店還是住阿爸阿媽屋企?」阿爾拔話:「住父母舊居好似太無面,倫敦酒店又貴到死,好彩女朋友有位死黨在倫敦買咗樓,入伙不久,啱晒,借俾我地住咗一個星期!」
阿爾拔話佢在倫敦出世,但呢生人恐怕幾難在倫敦買到樓咯,帝國學院所在區域,樓宇呎價在一千三百鎊以上,好多倫敦原居民都買唔起,特別係年輕人。左丁山聽見,幾乎大嗌一聲:「喂,平過沙田河畔花園噃,叫人去撈貨嘞!」阿爾拔聽咗,好唔高興,警告:「香港人唔好去倫敦炒樓!」
呢日在中環街頭又試碰到阿爾拔,問佢返鄉下之行如何?阿爾拔話:「好開心,最好就係住在女朋友嘅香港朋友嘅新入伙二房單位,位於Notting Hill區旁邊,行過去話都冇咁易,重溫茱莉亞羅拔絲與曉格蘭特嘅Notting Hill書店場景,好浪漫。不過現實啲,我地住嘅住宅大廈,人都唔多幾個,晚上九成烏燈黑火,我問番倫敦啲同學,佢地話呢類新樓,八九成俾亞洲人,特別係香港人、新加坡人與中國人買晒,作度假屋或投資用途,好少真正入住嘅。我就冇所謂呀,落得清靜,如果所有亞洲人業主入住,怕會有旺角咁嘈㖭!」問番佢間大廈嘅名稱,依稀記得係三年前在文華東方酒店搞過展銷會嘅,左丁山親戚都有去睇過,買唔成之嘛。業主買樓唔住呢啲事見怪不怪咯,強國人來香港買樓(如凱旋門),晚上咪又係黑沉沉。
同阿爾拔講咗幾句,走上陸羽飲茶,船務C正與期貨W拗緊香港樓市升跌,船務C三十年來買樓一路順景,賺錢仲多過佢自己盤生意喎,所以最近又再買多一層;期貨W以商品循環理論睇,貨品價格必有循環,佢話目前樓價上升周期已有13年,係時候要調整嘅嘞,叫船務C因住樓價急速下滑,將一啲持貨已久嘅單位,獲利回吐,減吓磅先。船務C就話素來睇淡香港樓市者必敗,價跌而唔敢吸納者,必然難以發達,一於唔駛驚,佢就係憑住呢鋪信心,過往三十年勝完又勝!期貨W炒慣期貨,見慣商品價格自低位反彈,自高位回落嘅循環,不敢看好地產後市。佢話因英國脫歐關係,歐美大公司對倫敦寫字樓需求減弱,價格亦向下調,有香港人就一於趁低吸納,到金絲雀碼頭掃貨,散戶如阿爾拔女朋友嘅朋友,大戶如期貨W之同行,皆到倫敦買住宅,買商廈,蔚為潮流。