【弄瓦之喜】劉翁讚太太成就解鎖 為囡囡改名劉一言
蘋果日報 2020/03/21 13:27
生女劉翁柳瑩
（IG圖片）
（新增回應）
恭喜，劉翁（Sunny Lau）弄瓦之喜！跟森美一齊主持商台節目《公子會》、早前與王貽興導演ViuTV劇集《黑市》兼著名攝影師劉翁，今日在社交網報喜，透露太太柳瑩（Rani）生了一個女，留言：「喊得好大聲 #母女平安」。柳瑩亦有拍片透露老公前一晚已到醫院準備陪產：「#SunnyJunior2 #今晚冇可能瞓得着 #慶幸老公醫院陪我過夜 #要驚一齊驚」。不少網民都恭喜劉翁，生了一子一女，湊成一個好字，加上繼女洛宜，一家五口樂也融融。
Sunny今日接受《蘋果》電話訪問，興奮表示可以三年抱兩說：「太太成就解鎖啦，可以封肚，我都封埋自己㗎啦。今次心理準備好足，喺照顧太太方面足好多，知道佢會抽筋呀、食凍嘢stop佢。」武漢肺炎肆虐，醫院始終是高危地方，問他有否格外小心？Sunny說:「口罩、酒精嗰啲都有，我哋都叫朋友唔好嚟探，淨係至親先嚟。」
榮升哥哥的劉晴（SJ）今日亦有到醫院探媽媽及妹妹，他說：「原本醫院唔畀12歲以下小朋友嚟，醫院啲人問佢，佢就話自己12歲（SJ今年3歲），因為囝囝一直好期待，所以畀佢嚟睇下。」至於女兒的模樣，Sunny笑指人人都覺得他與哥哥很相似：「但係我覺得佢靚過SJ囉，不過都係似我，唔緊要啦，Kate Moss細個都唔可愛㗎，佢應該都係行啲『特別』路線。」
他表示已親自為囡囡改名劉一言：「對於我嚟講，人生有好多嘢好重要，尤其係承諾。劉晴就係Sunny啦，一言可以係一言不合啦、一言九『頂』啦，不過我人生講得最多係『一言為定』，唔係好特別嘅嘢，但係我發現自己係講得出做得到嘅人，我希望佢係咁。」至於可會送禮給太太，答謝對方？Sunny說：「我真係冇多餘錢買禮物畀佢，因為我所有錢都畀哂佢，問佢攞錢，佢會問我要嚟做乜，真係冇可能偷偷地買禮物。」
劉翁去年曾捲入「安心偷食」事件，被指有男DJ經常上黃心穎屋企，森美和劉翁都成為嫌疑人物，事後劉翁太太柳瑩在社交網出post力撐老公：「當時人受嘅壓力已經大到正常人都支持唔住，唔好再將工作上面認識嘅男人全部入佢數。#人誰無過 #寬恕他人如同寬恕自己嘅罪過。」
採訪：盧妹
劉翁太太誕女，恭喜晒！ （IG圖片）
劉翁前一晚已在醫院陪伴太太 （Facebook影片截圖）
囝囝髮型由爸爸操刀，又剪得幾型仔。 （IG圖片）
黃心穎曾上《公子會》節目，與劉翁太太亦認識。（Facebook圖片）